Owesilisa udlwengule ingane yentombazane eneminyaka engu-11 ePietermaritzburg
Kuboshwe owesilisa ePietermaritzburg, KwaZulu-Natal, esolwa ngokudlwengula ingane yentombazane eneminyaka engu-11 ubudala.
Ngokusho kolwazi olutholakalayo, le ndoda kuthiwa ibisanda kufika eThekwini cishe emasontweni amathathu edlule. Kuthiwa ngesikhathi ihlala kule ndawo, yaze yajwayelana nabantu bakamakhelwane, ibavakashela njalo futhi iphuze nobaba wengane.
Kubikwa ukuthi ngokuhamba kwesikhathi le ndoda yaze yajwayelana nengane eneminyaka engu-11.
Kuthiwa izolo le ndoda ibidakiwe kangangokuthi ibingasakwazi ukuhamba, yabe isilaliswa kule ndawo.
Kusolwa ukuthi ebusuku, ngesikhathi abazali bengane belele, le ndoda yangena lapho kukhona khona ingane, yase iyihlukumeza ngokocansi.
Kuthiwa umama wengane uthole ubufakazi obubalulekile ngesikhathi ebuka ifoni yengane, lapho kuthiwa kwakukhona khona ividiyo ehlobene nalesi sigameko.
Amaphoyisa abikelwe ngalesi sigameko, kwathi umsolwa wagcina eboshiwe.
Udaba lusaphenywa ngamaphoyisa, kanti umsolwa uzovela enkantolo ukuze abhekane namacala abekwe wona.
